APOL

Habang salot walang lunas, 'sinusulong ang online class,

Nagpulong ang mga pantas, upang 'to'y maisabatas,

Mayro'n ilang tumaliwas, pakiwari'y hindi patas,

Nang resulta ay lumabas matutuloy din sa wakas.

Ang tanong ngayo'y paano, karamiha'y nalilito,

Kahit 'yung matatalino halos lahat problemado,

Ang iba'y walang trabaho, bagsak ang ilang negosyo,

Pag mamutol ang MERALCO, tiyak bagsak iyong grado.

Kahirapan ang dahilan, hindi lamang ng iilan,

Sa iba ang kahinaan, sa panuos walang alam,

Anu ang matututunan, ating mga kabataan,

Ang tanging may kahandaan, yaong mga mayayaman.

Computer laptop at tablet, cellphone TV at internet,

Mga mamahaling gamit, tunay ngang kaakit-akit,

Ngunit kahit na ipilit, sa 'min inyo ngang igiit,

Ang tanging laman ng wallet, kulang pa pag nagkasakit.

Payak na pasasalamat, sa mga gurong matapat,

Sa tulad namin na salat, kami'y inyong kabalikat,

Tinurua't iniangat, 'di tinuring na pabigat,

Sa inyo ang nararapat, mansanas na mayro'ng kagat. 😃

©MobiBard

Intellectual Rights Reserved.