LUHA

Kon kada pagturo hinin luha kasubo guinpapara,

Dire na gud kunta inin dughan masusul-an manta,

Kay tikang han adlaw nga ikaw ha akon en binmaya,

Mga luha ha mata dayuday pagturo natika agsob la.

Ha kada adlaw bisan ano en akon pagbuhaton,

Akon huna-huna pilit nalingi ha imo la ha gihapon,

Ngen nahuyop iton hangin nababay-ug iton mga dahon,

Kasing-kasing ko largo la ha imo nahinunumdom.

San-o dawla mapapara ikaw ha akon huna-huna?

Kon kada gi-os ko sugad-sugad la ikaw hit aada,

An aton mga guin agi-an makuri manta mapara,

Kay kada pagturo hinin luha en natikarampag la.

Kon dire gudla dara hinin tim-os nga paghigugma,

Dire na gud kunta ako ha imo en mag-uungara,

Pero kay ha sulod ha dughan ko aadi ka ngada yana,

Pababay-an ko an luha manggad sakit ha dughan ko en mawara.

©MobiBard

Intellectual Rights Reserved.

TUN-OG

Inin aton kinabuhi, sugad-sugad hiton tun-og,

Yana aton makikit-an, nuruniyan mawawaog,

Ngan kun ha aton kinabuhi, dire kita magtatangkod,

Sugad la kita hit nalurop, lubog nga tubig ha salog.

Ngan kun it aton kahimtang, en pirme la nga hayahay,

Siempre manta at tiagi, sugad la hit waray upay,

Guinkakahiribalag ngane, hin damo nga sumusulay,

Masagpi la it pag atras, dayun la nga napahuway.

Dire ta man iglilikaw, en kinabuhi maanyag,

Sugad-sugad hiton bukad, iya husay at karuyag,

Baysay niya kukulawan, ngada hasta hit kahalag,

Ayaw gud la hingalimti, ha kalibutan kita en mabulag.

Sugad liwat hiton banwa, kinabuhi igkumpara,

Yana aton makikit-an, burubuwas mawawara,

Pagdadaluson, igbubulad, susuritan ngen magmamara,

Pero kon may balor manta, bangen en saribuhan pa.

Sugad liwat hiton aso, kinabuhi en marisyo,

Ngen nahuyop iton hangin, naglulupad-lupad largo,

Ayaw gud la en pipirok, ngan ayaw gud panmamaklo,

Tigda la nga mawawara, bis di pa utod it em kulo.

Sanglit hinumdumi sangkay, kita la en lumalabay,

Ibutang ha kasing-kasing, en sugad la kita hit lagay,

Ginhuhurma, ginpipino, hit Diyos nga kita mag hingaupay,

Pag antos la bis pa makuri, ngan kun masurusuol danay. ❤️❤️❤️

©MobiBard

Intellectual Rights Reserved.