PATAGO

Wala natudlu-i, indi gindiktahan,
Apang tagipusuon, iya nga nabal-an,
Sa kadamuon sang tawo, sa bilog nga kalibutan,
Ang kagwapahon mo, wala gid sang komparahan.

Samtang ikaw ginatulok, kag ginahimutaran,
Sa painu-ino ko, nabatiagan na sang dughan,
Indi gid mapunggan, indi pag-untatan,
Ginapalangga ko ikaw, kinahanglan mo mabal-an.

Apang nga-a amo sini, daw pagkapait man,
Mahibal-an ko, may iban ka nga gintugyanan,
Basi palang ako, imo mahatagan,
Pagpalangga, bisan patago man.

PANULATON

Manami ang imo guya bisan ako nagapiyong akon makita,

Mga bibig mo nga mapula gusto nga mahalukan ka,

Ang matahum mo nga lawas mahakus bisan kaisa,

Makaptan kamot mo nga mamag-an daw galupad akon pamatyagan.

Kadamu sang gusto himuon kon tani ako man imo tamdun,

Kon puede lang nga butungon dalhun asta sa kadulmon,

Kag didto ang gusto himuon ako magdinalag-on

Apang asta sa subong nga tinion ikaw akon pagadamguhon.

Amo ina nga sa subong pabayaan masulat sang lapis ko,

Ang gina-ingus sang dughan himuon sa imo ang gusto,

Mahalukan kag mahakus tubtob nga isa na lang ikaw kag ako,

Tani malab-ut ang gusto bisan paagi man lang sa panulaton ko.

BAYBAYON

Sa higad sang baybay, paghigugma una nabatiagan,

Pareho kasadya sang balud, kag ang kadalum sang kadagatan,

Bisan pa may naga-upang, indi gid mahimo talikdan,

Ipakigbato bisan kan sin-o, kay paghigugma tampad man.

Halin sa pagbutlak sang adlaw, tam-an gid kasadya,

Kon kaisa aton kadlawanay, lab-ot tubtub langit palangga,

Sa higad sang baybay, nag-kaptanay, tuman kahugot gid ya,

Pirmi nagahaksanay, kon kaisa ginahakwat ka.

Sa sini nga pagkahimtang, naabtan kita sang kagab-ihon,   

Mapungko kag magdugsinganay, sa mapino nga balason, sang baybayon,

Sa hinali dungan, nagsara ang mga mata naton,

Tubtub...mga halok, tuman kamabinatiagon.

Isa ka adlaw indi natalupangdan, magkaupod tubtub kaagahon,

Kita nagahaksanay, sang mahugot sa gihapon,

Abi ko kaina, nagadalamguhanon,

Nalab-ot ang punta, sang langit naton.

Pagkatapos sadto, indi kana makit-an,

Sa adlaw-adlaw sa tanan, higad sang baybay ginakadtuan,

Nagapasimpalad, basi mapamasyaran,

Nagahulat sa imo, sa katubtuban.

Ari ako subong masinulub-on, nagaisahanon,

Talagsa nagapamasyar, sa higad sang baybayon,

Kun masayran, kag imo panumdumon,

May ara na apo, kun imo pamangkuton.

©MobiBard

Intellectual Rights Reserved.

Campidhan Beach, San Julian, Eastern Samar, Philippines / Boybskie

ULAN

Kon kaisa manami man maghibi sa ulan,

Ang pagtulo sang luha sa ulan malipdan,

Halin sang paglakat mo palibot ko nabuk-an,

Tubtob karon sakit sa dughan ang nabatiagan.

Kon hinali magdulom ang kalangitan,

Dughan sekreto nagayuhom may kalipayan,

Tungod ang kaakig sang imo ako biyaan,

Akon ipautwas mga kasakit nga nabatiagan.

Daw bata ako nga nagtampisaw, nagadalagan,

Kasakit sang dughan akon isinggitan,

Kon kaisa akon pangamuyo magtaliwan,

Basi indi na sang adlaw masikatan.

Yari karon isahanon nagalakat ako,

Pamatiagan ko daw nagatululo,

Pero nagapamangkot nga-a may indi amo?

May ara landong sang payong nga nakita ako.

Ang pagtulo sang luha indi mapunggan,

Apang indi na kaakig akon nabatiagan,

Kapin pa sang ako iya gin agbayan,

Kabay di mag untat, magbaskug pa ang ulan.

©MobiBard

Intellectual Rights Reserved.

Campidhan-Nena Beach, San Julian, Eastern, Samar, Philippines / Boybskie