KAPE AT AKLAT

Ang kape at aklat kapiling kong sapat,

Mula sa paggising hanggang sa pag inat,

Mata'y ipupukol sa letra at sulat,

Habang humihigop ng kapeng masarap.

Mga impormasyon na nahahalungkat,

Sa bawat taludtod maging pangungusap,

Ay  nagpapamulat sa aking ulirat,

At kamalayan ay tiyak masisipat.

Dapat na labanan yaong kamangmangan,

H'wag basta manalig sa usap-usapan,

Dapat ay may aklat na binabasehan,

Kawangis ng bato na matutungtungan.

Dapat din turuan ating kabataan,

Na ang pagbabasa ay makahiligan,

Lakas ng katawan 'di lagi basehan,

Upang magtagumpay sa bawat larangan.

Gisingin ang diwa na naging kampante,

Ligligin ugaing magkamalay muli,

Simulang magbasa ng aklat magsipi,

Upang karunungan muling magkasindi.

Kaya ihanda na yaong taborete,

Sabayang magkanaw ng barakong kape,

Ang librong matagal nang pinid sa tabi,

Ay buksan na muli't baybaying maigi.

©MobiBard
Intellectual Rights Reserved.