GARATIYA

Minsan ako'y niyaya ni San Pedro gumala,
Kanyang ikinukwento sabik akong makita,
Pagdaka ay nabuksan pinto na mahiwaga,
Pinto pala ng langit, aba! ako'y nabigla!
 
Mga nasaksihan ko ay nakagugulantang,
Ang mga natanaw ay 'di ko inaasahan,
Tila baga'y sekretong sadyang nahiwagaan,
Animo ay nililo nagtalo ang isipan.
 
Mga dating lasenggo ang una sa nasulyap,
Dati na magnanakaw dito ay mahahanap,
Mga makasalanan dami kong nahagilap,
Mali nga ba si Pedro at akong nakausap?
 
Isipa'y nagtatalo tinanong ko ang Kristo,
"Sila ba'y nararapat patirahin Mo dito?"
Ang tugon N'ya sa akin tumagos sa'king puso,
"Sila'y nagtanong din kung bakit ka nandito?"
 
©Mobibard / Intellectual Rights Reserved.