AMPALAYA

Hindi alintana sa mga pangamba,

Tao'y lumalabas sa mga kalsada,

Dahil sa kinapos sa kanyang kinita,

At tulong ng hari hindi napasama.

Ang bagsik ng haykap kamataya'y dala,

Maglagi sa bahay yaong panukala,

Upang maiwasang kumalat, manghawa,

Problema ng bayan nawa ay humupa.

Ang utos ng hari tila balewala,

Kung kalam ng tiyan yaong nakataya,

Mga naihayag sa mga balita,

Pangako na tulong pilit kinakapa.

Bakura'y taniman ng mga halaman,

Programang solusyon ng kagawaran,

Nagbabadyang gutom ay maiiwasan,

Kung magtatanim nga ng gulay si Juan.

Payak na tugon ko upang 'di mahawa,

Sa Covid na salot at mapaminsala,

Sa utos ng hari dapat tumalima,

Huwag na magmaktol magtanim ng kusa.

Ampalayang tanim nawa maging tandâ,

Na sana tayo nga'y tuluyang lumaya,

Ang haykap na Covid nawa ay mawala,

At mga paa ko'y sabik ng gumala.

©MobiBard
Intellectual Rights Reserved.