MobiBard: BALON

Noong unang panahon uso pa ang balon,

Igiban ng tubig sa uhaw pang tugon,

Maging sa pananim pandilig ding layon,

At alagang hayop ay pinapainom.

Pati magsing-irog tagpuan din iyon,

Matamis na "oo" saksi yaong balon,

Dahil 'di pa uso noon itong cellphone,

Na isang pindot lang kaagad may tugon.

Ang halamang rosas pag hindi nadilig,

Ng tubig sa balong saksi sa pag-ibig,

Baka ang pag irog ay biglang manlamig,

Tiyak magdidilim guguho'ng daigdig.

Malinaw n'yang tubig larawa'y salamin,

Tila nakikita ngiti mong malambing,

Kaya h'wag lalayo huwag lilisanin,

Baka pag-alis mo puso ay manimdim.

Sa balon ding iyon nakamtan ang tugon,

Sa sigwa ng buhay na puno ng hamon,

Kaya ang kahapon pag iyong nilingon,

Sagot na hanap mo naroon sa balon.

Ngunit pagmasdan mo ating buhay ngayon,

Hindi na banayad panay na ang alon,

Mga pangarap ay tila nilalamon,

Laging nangangapa hindi na matunton.

Legendary Well (Balon) located at Campidhan, San Julian, Eastern Samar, Phils. dug by the late Pedro Orcuse & his children.

Home