MobiBard: YAGIT

Hindi alintana, ang mga pangamba,

Makapaglaro lang, sa tabing kalsada,

Nais mang pumasok, maging sa arkada,

Tiyak haharangin, kaagad ng g'wardia.

Madalas kutyain, tawanan, hamakin,

Karapatan man din, sila'y pasayahin,

Maging sa liwasan, minsa'y kaladkarin,

Nararanasan din, kung minsa'y batuhin.

Payak lang ang nais, nilang mga yagit,

Kabataang saya, nais lang masulit,

'Di naman sinadya'ng, lagay na sinapit,

Kahit manlang laro, ba't ipagkakait?

Sila'y nangangarap, pantay na paglingap,

Yakap ng magulang, ay inaapuhap,

Kaya sa kalaro, tanging pakiusap,

H'wag na h'wag lilisan, kahit isang iglap.

Pag iyak kung minsan, ay 'di mapigilan,

Kahit na pilitin, na siya ay tumahan,

Laging nagtatanong, sa bigat na tangan,

Walang mahingahan, wala rin tahanan.

Kaya sa susunod, na ika'y lapitan,

Nilang mga yagit, sa mga lansangan,

At pag nagkataon, na ika'y hingian,

Itatakwil mo ba, at pagtatawanan?

Street Children @ Binondo Plaza Captured by Carole Adawag

Home